Türkmənistanın Karakum səhrasında yerləşən və “Cəhənnəmin qapısı” kimi tanınan Darvaza Qaz Kraterindəki alovların zəiflədiyi açıqlanıb.
Prestij.media xəbər verir ki, yarım əsrdən artıqdır fasiləsiz yanan nəhəng kraterdə aparılan işlərdən sonra ilk dəfə sönmə əlamətləri müşahidə olunub.
Təxminən 60-70 metr diametrə malik Darvaza Qaz Krateri dünyanın ən qeyri-adi turizm məkanlarından biri hesab olunur. Gecə saatlarında yüksələn alovlara görə “Cəhənnəmin qapısı” adlandırılan krater hər il minlərlə turistin diqqətini cəlb edir.
Məlumata görə, krater 1970-ci illərin əvvəllərində sovet geoloqlarının təbii qaz axtarışları zamanı yerin çökməsi nəticəsində yaranıb. Ətrafa yayılan metan qazının qarşısını almaq məqsədilə alovlandırılan çuxurun bir neçə həftə ərzində sönəcəyi gözlənilsə də, zəngin qaz ehtiyatları səbəbindən alovlar onilliklər boyu yanmağa davam edib.
Son illərdə Türkmənistan hökuməti krater ətrafında yeni qaz quyuları qazaraq yeraltı qazı nəzarətli şəkildə hasil etməyə başlayıb. Mütəxəssislərin fikrincə, bu addımlar krateri qidalandıran qazın həcmini əhəmiyyətli dərəcədə azaldıb. Peyk məlumatlarına əsasən, son üç ildə alovların yaydığı istilik 75 faizdən çox azalıb.
Alimlər kraterin qısa müddətdə tam sönəcəyini qəti şəkildə söyləməsələr də, mövcud göstəricilər yarım əsrdən çoxdur yanan “Cəhənnəmin qapısı”nın əvvəlki gücünü itirdiyini və gələcəkdə tamamilə sönə biləcəyini göstərir.
