“YAŞAT” Fondunun və ASAN Könüllüləri Təşkilatının birgə təşkilatçılığı, TABİA Group və Lankaran Springs Wellness Resortun tərəfdaşlığı ilə həyata keçirilən 5-ci “YAŞAT” düşərgəsinin birinci həftəsi yekunlaşıb.
Düşərgənin ilk həftəsində 10-11 yaşlı 56 şəhid övladı üçün həm maarifləndirici, həm də əyləncəli proqramlar təşkil olunub. Uşaqlar hər gün səhər idmanı ilə günə başlayaraq müxtəlif təlimlərdə, ustad dərslərində və əyləncə tədbirlərində iştirak ediblər.
Proqram çərçivəsində Asterias Təlim və İnkişaf Mərkəzi tərəfindən robotexnika təlimləri, ABAD tərəfindən isə müxtəlif ustad dərsləri keçirilib. Eyni zamanda, hovuz saatları, stolüstü idman oyunları və digər əyləncə fəaliyyətləri uşaqların marağına səbəb olub.
Dayaq Xeyriyyə Cəmiyyəti ağız sağlamlığının qorunmasına dair maarifləndirici təlim təşkil edib. Gənc Psixoloqlar İctimai Birliyinin mütəxəssisləri tərəfindən qrup terapiyaları və fərdi görüşlər keçirilib.
Mədəni proqram çərçivəsində Azərbaycan Dövlət Kukla Teatrının təqdimatında “Qaraca qız” tamaşası nümayiş olunub, “Oyun ustası” tərəfindən komanda oyunları təşkil edilib. Həmçinin “Forest Education Azerbaijan” ilə qızıl axtarışı oyunu keçirilib, günün davamında idman yarışları və açıq havada kino saatı təşkil olunub.
ASAN Radio və TV-nin təşkilati dəstəyi ilə baş tutan konsert proqramında Rəssam və Araz çıxış edərək uşaqlarla xoş anlar yaşayıblar.
Layihə çərçivəsində ümumilikdə 400-ə yaxın şəhid övladının düşərgədə iştirakı nəzərdə tutulur.
