Dünya şöhrətli futbolçu Lionel Messi Argentina seçməsinin heyətində dünya çempionatları tarixində həm ən gənc, həm də ən yaşlı qol vuran oyunçu kimi öz rekordunu təzələyib.
Mundialın qrup mərhələsinin birinci turu çərçivəsində keçirilən Əlcəzairlə qarşılaşmada het-trik edən ulduz hücumçu, komandasının 3:0 hesablı qələbəsini təmin edib.
İyunun 24-də 39 yaşını qeyd edəcək Messi bu uğurla dünya birinciliklərində qol sevinci yaşayan ən yaşlı argentinalı oyunçu ünvanına sahib çıxıb. Maraqlı məqamdır ki, o, mundialda ilk qolunu düz 20 il əvvəl – 2006-cı ildəki dünya çempionatında Serbiya və Monteneqro millisinə qarşı keçirilən və Argentinanın 6:0 hesablı qələbəsi ilə bitən matçda vurmuşdu.
Xatırladaq ki, qrup mərhələsinin növbəti turunda Argentina yığması iyunun 22-də Avstriya ilə qarşılaşacaq. Əlcəzair komandası isə iyunun 23-də İordaniya seçməsi ilə üz-üzə gələcək.
