Mütəxəssislər bildirirlər ki, arıqlamaq istəyən bir çox insan fərqinə varmadan maddələr mübadiləsinə mənfi təsir göstərən vərdişlərə yol verir. ABŞ-li həkimlərə görə, xüsusilə səhər yeməyindən imtina etmək, gec saatlarda qidalanmaq və sürətli yemək çəki itkisinin qarşısını alan əsas amillər sırasındadır.
Daxili xəstəliklər üzrə mütəxəssis Anette Bosworth qeyd edib ki, bəzi insanlar aralıqlı oruc və ya pəhriz səbəbindən səhər yeməyini tamamilə həyatlarından çıxarırlar. Nəticədə gün ərzində qəbul edilməyən kalorilər axşam saatlarında daha böyük porsiyalar və ya yüksək kalorili qəlyanaltılarla kompensasiya olunur.
Həkimlərin sözlərinə görə, gecə saatlarında yemək qəbulu qanda şəkərin səviyyəsinin yüksəlməsinə və insulin müqavimətinin artmasına səbəb ola bilər. Bu isə zamanla artıq çəki və diabet riskini artırır.
Mütəxəssislər həmçinin sürətli yemək vərdişinin də təhlükəli olduğunu vurğulayırlar. Araşdırmalar göstərir ki, yeməyi tələsik qəbul edən insanlar daha gec doyduqlarını hiss edir və bu da həddindən artıq qidalanmaya səbəb olur.
Həkimlər günün ilk yarısında zülal və faydalı yağlarla zəngin qidaların qəbul edilməsini, qidalanma rejiminin isə balanslı şəkildə qurulmasını tövsiyə edirlər.
//Prestij.media
