Türkiyədə internet elanları ilə bağlı yeni vergi tənzimləməsi qüvvəyə minib. Qaydalara əsasən, daşınmaz əmlak, avtomobil, əşya və xidmətlərin satışı və ya icarəsinə imkan verən rəqəmsal platformalar elan sahibləri və elanlarla bağlı məlumatları hər ay Gəlirlər İdarəsinə təqdim etməlidir.
Bildiriləcək məlumatlara elanın yayımlandığı internet ünvanı, elan sahibinin adı, soyadı və ya şirkət adı, Türkiyə vətəndaşının şəxsiyyət nömrəsi, xarici şəxsiyyət nömrəsi və ya vergi nömrəsi, həmçinin satılan və ya icarəyə verilən ev, torpaq, avtomobil, əşya və xidmətlə bağlı məlumatlar daxildir. Məqsəd qeyri-rəsmi iqtisadi fəaliyyətin və vergi itkilərinin qarşısını almaqdır.
Yeni tənzimləmə elektron ticarət və elan saytları ilə yanaşı, sosial media platformalarını, internet xidmət təminatçılarını, məzmun təminatçılarını və hostinq xidməti göstərən qurumları da əhatə edir. Vergi orqanı şirkətlərin fəaliyyət sahəsi, dövriyyəsi, əməliyyat məbləğləri və təqdim etdiyi məhsul və xidmətlərə əsasən əlavə məlumatların toplanmasını və tələb olunduqda təqdim edilməsini də istəyə bilər.
Prestij.media
