Tikintidə ustaların məhlulun daha rahat yayılması üçün istifadə etdiyi qab yuyucu vasitənin betona təsiri elmi araşdırılıb. Məlum olub ki, bu üsul daşıyıcı sütunlarda istifadə olunan betonun möhkəmliyini əhəmiyyətli dərəcədə azalda bilər.
Qab yuyucu vasitənin tərkibindəki səthi aktiv maddələr sement və qum hissəcikləri arasındakı mayenin daha yaxşı yayılmasına kömək edir. Nəticədə məhlul daha axıcı olur və qarışdırılma zamanı betonun daxilində xırda hava qabarcıqları yaranır. Bu boşluqlar beton bərkidikdən sonra onun yükdaşıma qabiliyyətini və mexaniki möhkəmliyini zəiflədir. Məlumata görə, betondakı hava boşluqlarının həcminin hər 1 faiz artması son möhkəmliyi təxminən 5 faiz azalda bilər.
Mütəxəssislər qab yuyucu vasitə qatılmış məhlulun yalnız suvaq və digər yük daşımayan kiçik təmir işlərində istifadə edilə biləcəyini bildirirlər. Sütun, kiriş, təməl və döşəmə kimi daşıyıcı konstruksiyalarda isə məişət deterjanından istifadə etmək əvəzinə xüsusi plastifikatorlardan yararlanmaq tövsiyə olunur.
Prestij.media
