Avropada təsirini göstərən güclü isti hava dalğasının qarşıdakı günlərdə daha da şiddətlənəcəyi gözlənilir. Bir sıra ölkələr yüksək temperaturun təsirlərini azaltmaq üçün xüsusi tədbirlər görməyə başlayıb.
Fransada həftəsonu isti hava ilə əlaqəli ölüm halları qeydə alınıb. Ölkədə yüzlərlə məktəb bağlanıb, minlərlə şagird isə dərslərdən daha tez buraxılıb. Bəzi bölgələrdə havanın temperaturu 40 dərəcəni keçib.
Fransa və Belçikada dəmir yolu xidmətlərində məhdudiyyətlər tətbiq olunub, bəzi qatar reysləri ləğv edilib. Meteoroloqlar Belçikada qarşıdakı günlərdə tarixdə qeydə alınan ən yüksək temperatur göstəricilərinin yenilənə biləcəyini bildirirlər.
İspaniyada da temperaturun bəzi ərazilərdə 44 dərəcəyə çatacağı proqnozlaşdırılır. Böyük Britaniyada isə mütəxəssislər iyun ayı üzrə bütün istilik rekordlarının qırılacağını açıqlayıblar.
Alimlər bildirirlər ki, müşahidə olunan ekstremal istilər iqlim dəyişikliyinin təsirlərinin daha da gücləndiyini göstərir.
Prestij.media
