ABŞ-ın Klivlend şəhərində Erie gölünün çirklənməsini azaltmaq məqsədilə yeraltı tunel inşa ediləcək. Təxminən 6,8 kilometr uzunluğunda və 6 metr diametrində olacaq tunel güclü yağışlar zamanı kanalizasiya sistemindən daşan çirkab suların qarşısını almağa kömək edəcək.
“Big Creek” adlandırılan tunel bəzi ərazilərdə yerin 30 metr dərinliyindən keçəcək. Layihənin dəyəri təxminən 325 milyon dollar qiymətləndirilir. Tikintiyə 2026-cı ilin sonlarında başlanması və işlərin 2031-ci ilədək tamamlanması planlaşdırılır.
Mütəxəssislərin hesablamalarına görə, tunel istifadəyə verildikdən sonra su hövzələrinə qarışan kanalizasiya sularının həcmi ildə təxminən 2,08 milyard litr azalacaq. Layihə həmçinin güclü yağışlar zamanı ərazidə yaranan su basqınlarının azaldılmasına xidmət edəcək.
Prestij.media
