Son illərdə gənclər arasında ürək tutması və infarkt hallarının artması həkimləri narahat edir. Mütəxəssislər bildirirlər ki, əvvəllər daha çox yaşlı insanlarda müşahidə olunan bu problem artıq 30 yaşlı şəxslər arasında da geniş yayılmağa başlayıb.
Kardioloq Ahmet Akçayın sözlərinə görə, isti havalarda susuz qalmaq və əvvəldən mövcud olan, lakin aşkarlanmayan risk faktorları ciddi ürək-damar problemlərinə səbəb ola bilər. Xüsusilə risk qrupunda olan şəxslərin qəfil və intensiv idmanla məşğul olması təhlükəli nəticələr yarada bilər.
Mütəxəssis qeyd edib ki, bəzi insanlarda irsi meyillilik, yüksək təzyiq, diabet və digər gizli sağlamlıq problemləri vaxtında aşkar olunmadığı üçün ağır ürək ritm pozğunluqları və infarkt riski artır.
Həkimlər hər kəsə, xüsusilə də aktiv idmanla məşğul olan şəxslərə ailə tarixçəsini və ürək-damar risklərini yoxlatmağı tövsiyə edirlər. Risk faktorlarının vaxtında müəyyən edilməsi həm infarktın, həm də digər ciddi fəsadların qarşısını almağa kömək edə bilər.
//Prestij.Media
