Avqustun 27-də Qubada 11 yaşadək futbolçular arasında keçirilən III “Ulduz Cup” beynəlxalq turnirinə yekun vurulub.
Bürünc medal uğrunda qarşılaşmada Özbəkistanın “Paxtakor” komandası “Qarabağ”ı 2:0 hesabı ilə məğlub edərək turnirin üçüncüsü olub.
Turnirin finalında isə “Ulduz” Futbol Akademiyası ilə Polşanın “Drukarz” komandası üz-üzə gəlib. Qarşılaşmada 1:0 hesabı ilə qalib gələn Polşa təmsilçisi “Ulduz Cup”ın qalibi adını qazanıb. “Ulduz” FA ikinci, “Paxtakor” isə üçüncü yeri tutub.
Tədbirin bədii hissəsində gimnastika üzrə nümunəvi çıxışlar və milli rəqslər nümayiş etdirilib.
Yarışın sonunda fərdi nominasiyalar üzrə də qaliblər müəyyənləşib. “Dinamo Tbilisi”nin (Gürcüstan) futbolçusu Giorgi Zekalaşvili turnirin ən yaxşı oyunçusu seçilib. “Qarabağ” FK-nın üzvü Əli Əliyev bombardir, “Ulduz” FA-nın qapıçısı Dilqəm Salmanov isə ən yaxşı qapıçı adına layiq görülüb.
Qeyd edək ki, III “Ulduz Cup” Gənclər və İdman Nazirliyi, AFFA və “Ulduz” Futbol Akademiyasının birgə təşkilatçılığı ilə keçirilib. Üçüncü dəfə təşkil olunan beynəlxalq turnirdə 7 ölkədən 12 komanda iştirak edib.
