Qərbi Antarktidada yerləşən 1,6 milyon kvadratkilometr ərazini əhatə edən Mari Berd Torpaqları heç bir dövlətin rəsmi olaraq ərazi iddiası irəli sürmədiyi dünyanın ən böyük sahibsiz ərazilərindən biri hesab olunur. Polşadan təxminən 5 dəfə böyük olan bölgə buz örtüyünün altında gizlənən nəhəng vulkanik və geotermal quruluşlarla diqqət çəkir.
Beynəlxalq araşdırmalar zamanı buz təbəqəsinin altındakı geotermal istilik axınının əvvəlki hesablamalardan 50 faiz daha yüksək olduğu müəyyənləşdirilib. Bölgənin dərinliklərində ən azı 138 vulkanik isti nöqtənin olduğu aşkarlanıb. Alimlər bu istilik mənbələrinin buzlaqların əriməsinə təsir göstərə biləcəyini bildirirlər.
Mari Berd Torpaqları Antarktika Müqaviləsi çərçivəsində yeni ərazi iddialarının qarşısını alan xüsusi hüquqi rejimə tabedir. Bölgədə temperaturun mənfi 80 dərəcəyə qədər düşməsi və güclü küləklər elmi tədqiqatları çətinləşdirir. Buna görə məlumatların toplanmasında əsasən külək və günəş enerjisi ilə işləyən avtomatik sensorlardan istifadə olunur.
Prestij.media
